لاہور(نمائندہ خصوصی) جزوی لاک ڈائون میں مزید نرمی کا فیصلہ وزیر اعلیٰ پنجاب نے ٹیکسٹائیل انڈسٹر اور دیگر چھوٹے کاروبار کھولنے کی اجازت کےلیے وفاق کو سفارشات بھیج دیں۔
تفصیلات کے مطابق وزیراعلیٰ پنجاب سردار عثمان بزدار سے اپٹما کے سربراہ گوہر اعجاز کی قیادت میں صنعتکاروں اور تاجربرادری کے نمائندہ وفدنے ملاقات کی۔ ملاقات کے دوران صنعتکاروں اور تاجر برادری کے مسائل کے حل کے حوالے سے بات چیت کی گئی۔ وزیراعلیٰ عثمان بزدار نے ملاقات کے دوران صنعتکاروں اور تاجر برادری کے مسائل جلد حل کرنے کی یقین دہانی کراتے ہوئے کہا کہ پنجاب حکومت صنعتکاروں اور تاجر برادری کے لئے مزیدآسانیاں پیدا کرے گی-
وزیراعلیٰ پنجاب عثمان بزدار نے کہا کہ کاروبار چلنے سے ہی عام آدمی کو روز گار ملے گا- کورونا وباء کے باعث سب سے زیادہ مشکلات کا شکار عام آدمی ہے- ہمارا مقصد عام آدمی کی مشکلات کاازالہ ہے- انہوں نے کہا کہ پنجاب میں مرحلہ وار کا روبارکی اجازت دینے کے لئے ایس او پیز تیار کر لئے گئے ہیں – صنعتکاروں اور تاجر برادری کو وضع کردہ ہدایات پر عملدرآمد کرنا ہوگا- ایس او پیز کی خلاف ورزی پر انڈسٹری کوبند کر دیاجائے گا-
سردارعثمان بزداربزدار نے کہا کہ روڈ سیکٹراور بلڈنگ کے علاوہ کنسٹرکشن سے متعلقہ دیگر انڈسٹری کو کھولنے کی اجازت دی جائے گی،سفارشات تیار کر کے وفاقی حکومت کو پیش کردی ہیں۔ وفاقی حکومت کی مشاورت سے ایکسپورٹ سیکٹر سے منسلک فیڈنگ انڈسٹری کو بھی کھولا جائے گا- پاور لومزکو کام کرنے کی اجازت دے رہے ہیں –
وزیراعلیٰ عثمان بزدار نے کہا کہ ایسی تمام فیکٹریز جن کے اندر اپنی لیبر کالونیاں موجود ہیں انہیں بھی کھولنے کی سفارش کی ہے- آئرن اینڈ سٹیل انڈسٹری اور ہوم اپلائسسز انڈسٹری کو کھولنے کی تجویز دی ہے۔ مارکیٹوں اور بازاروں کومرحلہ وار اوپن کیاجائے گا- زوننگ کر کے مارکیٹوں اور بازاروں کو مخصوص دن او رمخصوص اوقات میں کھولنے کی تجویز ہے- تمام سٹیک ہولڈرز کی مشاورت سے مارکیٹیں اور بازار کھولنے کا فیصلہ کیا جائے گا- صنعتکاروں او رتاجر برادری کے مسائل کے حل کے لئے صوبائی وزیر صنعت کی سربراہی میں کمیٹی تشکیل دی ہے ۔ وزیراعلیٰ پنجاب نے کہا کہ کاروبار چلنے سے عام آدمی کو روزگار ملے گا-
چیئرمین اپٹما گوہر اعجاز نے کہا وزیراعلیٰ عثمان بزدار نے کورونا وباء میں فرنٹ لا ئن پر کام کر کے عوامی خدمت کی نئی مثال قائم کی ہے- وزیراعلیٰ عثمان بزدار حقیقی معنوں میں وسیم اکرم پلس ثابت ہوئے ہیں۔ صنعتکاروں او رتاجر برادری کے مسائل کے حل کے لئے وزیراعلیٰ عثمان بزدار کے اقدامات کو سراہتے ہیں۔ وزیراعلیٰ عثمان بزدار سے ملاقات کرنے والوں میں صدر لاہور چیمبر آف کامرس اینڈ انڈسٹری عرفان اقبال شیخ،عدیل بشیر، احمد ظفر،پرویز لالہ،اکبر شیخ،ایس ایم نبیل اور دیگرشامل تھے۔ صوبائی وزراء میاں اسلم اقبال، ہاشم جواں بخت، فیاض الحسن چوہان، وائس چیئرمین ایل ڈی اے شیخ عمران، سیکرٹری اطلاعات او رمتعلقہ حکام بھی اس موقع پر موجود تھے
